समाज भूषण पुरस्कार २०२४

​

समाज भूषण पुरस्कार २०२४ हा श्री. सुधाकर जोमा म्हात्रे, कोपरखैरणे ह्यांना त्यांच्या सामाजिक व गृहनिर्माण क्षेत्रांतील अमूल्य योगदानासाठी १६ फेब्रुवारी २०२४ रोजी फाऊंडेशनच्या द्वितीय वर्धापनदिन सोहळ्यात प्रमुख पाहुणे डॉ. राजेश करंकाळ, इंग्रजी विभागप्रमुख, मुंबई विद्यापीठ ह्यांच्या हस्ते अर्पण करण्यात आला.

​

त्यांना देण्यात आलेले मानपत्र :

​

समाज भूषण श्री. सुधाकर जोमा म्हात्रे

मानपत्र

"तुमच्या ऐन उमेदीच्या काळात स्थानिक आगरी-कोळी-नवबौद्ध-कातकरी समाजाच्या तोंडातला घास व डोक्यावरचे छप्पर सिडकोने हिरावून घेतले. निसर्गक्रमानुसार ह्या समाजाची लोककसंख्या वाढेल तेव्हा त्यांना घरे पुरवण्याचे तर दूरच परंतु नकाशांवर मनमान्या रेषा आखून त्यांची राहती घरे तोडून सिडकोने त्यांना बेघर केले. अशा ह्या तुघलकी संकटाच्या काळी तुम्ही आपल्या समाज-बांधवांच्या मदतीस धावून आलात व स्वतःस गृहनिर्माण क्षेत्रास वाहून घेतले. संपूर्ण नवी मुंबई क्षेत्रातील गावठाणांमध्ये आपल्या अथक परिश्रमाने शेकडो इमारती उभ्या राहिल्या ज्यांमध्ये केवळ सिडकोनेच नव्हे तर अवघ्या शासन यंत्रणेने वाऱ्यावर सोडलेल्या भूमिपुत्रांच्या तीन पिढ्या आज आनंदाने नांदत आहेत. मोठा गाजावाजा केलेले सिडकोचे साडेबारा टक्के सोडा पण सिडकोच्या साडेबारा दमड्या देखील न मिळालेला भूमिपुत्रांचा एक फार मोठा वर्ग ह्या नवी मुंबईत आहे ज्यांच्याकडून कसल्याही नफ्याची व लाभाची अपेक्षा न करता तुम्ही त्यांना घरे बांधून दिलीत. त्यांच्या मुलाबाळांच्या डोक्यावर निवारा उभा केलात! आणि हे सर्व करत असताना प्रसिद्धीची-प्रतिष्ठेची हाव बाळगणे तर दूरच पण हे एवढे प्रचंड कार्य तुम्ही कधी कोणत्या व्यासपीठावर मांडले देखील नाही! आपल्या ह्या अतुलनीय कार्याद्वारे आपण नवी मुंबईतील स्थानिक समाजावर जे आकाशाएवढे उपकार केले आहेत त्यांची नम्र जाणीव ठेवून आम्ही आपणांस हे मानपत्र अर्पण करीत आहोत."

*****