महाविद्यालयीन विद्यार्थ्यांच्या उपजत व कमावलेल्या भाषा-कौशल्यांचा वापर करून त्यांची रोजगारक्षमता वाढवणे हे उद्दिष्ट्य डोळ्यांसमोर ठेवून सीताराम म्हात्रे फाऊंडेशन निःशुल्क भाषांतर प्रशिक्षण वर्ग चालविते. त्यासाठी फाऊंडेशनचे संस्थापक-अध्यक्ष श्री. चंद्रकांत काळुराम म्हात्रे ह्यांनी भाषांतर क्षेत्रातील त्यांच्या दशकभरातील आंतरराष्ट्रीय अनुभवाचा उपयोग करून Certificate in Computer Assisted Translation (C-CAT) हा अभ्यासक्रम तयार केला आहे. भाषांतरासंबंधी विविध कौशल्ये शिकविण्यासाठी प्रकल्प पद्धतीचे उपयोजन करणाऱ्या ह्या अभ्यासक्रमाचे वैशिष्ट्य म्हणजे विद्यार्थ्यांनी केलेले कोणतेही अभ्यासकार्य कागदांच्या रद्दीची भर बनण्याऐवजी इंटरनेटवरील उपलब्ध ज्ञान-संसाधनांमध्ये भर घालते. त्यामुळे भाषांतरासंबंधी ही कौशल्ये आत्मसात करत असतानाच विद्यार्थ्यांचा पोर्टफोलिओ तयार होतो ज्यामुळे त्यांना रोजगाराच्या अधिक संधी उपलब्ध होतात. भारतातील विद्यापीठे व महाविद्यालयांमध्ये शिकविल्या जाणाऱ्या भाषांतर अभ्यासक्रमांमध्ये सर्वाधिक भर हा साहित्यिक भाषांतरावर दिला जातो ज्यामध्ये रोजगाराच्या संधी अगदी नगण्य असतात. मात्र फाऊंडेशनद्वारे शिकविल्या जाणाऱ्या C-CAT अभ्यासक्रमामध्ये अंतरराष्ट्रीयीकरणाचा अविभाज्य अंग असलेल्या स्थानिकीकरणावर (Localization) सर्वाधिक भर दिलेला आहे जेणेकरून हा अभ्यासक्रम पूर्ण करणाऱ्या विद्यार्थ्यांचा लक्षावधी डॉलर्सची उलाढाल होणाऱ्या लोकलायझेशनच्या क्षेत्रातील प्रवेश सुकर व्हावा. प्रकल्पाधिष्ठित अध्यापनपद्धती व एकविसाव्या शतकातील रोजगाराच्या संधींशी सुसंगत असा लोकलायझेशन अध्ययन कार्यक्रम समाविष्ट असलेला C-CAT हा संपूर्ण भारतातील एकमेवाद्वितीय भाषांतर अभ्यासक्रम आहे.